Rom 9 | KZE | STEP | kemá Póro Ísu Káráísitina kwaásima éꞋa árair-aine suꞋmai kwésunana Áánútun-amanko kesirumpimbá ména kárákwiyisaꞋa maarán-áímbá árair-aimba kwésimatimune.

Romans 9

Póro Ísareri-kwaasi arumbá umátínkarain-kwasai.

1 kemá Póro Ísu Káráísitina kwaásima éꞋa árair-aine suꞋmai kwésunana Áánútun-amanko kesirumpimbá ména kárákwiyisaꞋa maarán-áímbá árair-aimba kwésimatimune. 2 kesí kwaási Ísareri-kwaasivinkembo kemá tiráunda isaꞋá imáyáa únana sirumbá kwéisana sirunkó umbaí támae kwéiyiye. 3 miwí Ísu Káráísitin-aaiyavesa íma áraire sembá pósa árairemo sésamo kesí anondámo usámaiyanamo Áánútumo siyuwáínanamo Ísu Káráísitimo ánaaembo umásiyuwanimba mindá kanaániye kwésune. 4 miwí kesí kwaási Ísareri-andarakewai Áánútu kwenáánimbaariꞋa umái ítámakena kwená ságayamba agaráátinkena aaimá simái tarútinkena kwená ámáámba simátimena simái asirámakain-aimba simátimena Áánútuna imáyáamo mósá kwémaraan-amba agaráátinkowasa 5 ááéraan-anon-kwaasi miwí tíkwáꞋnáma uwaná Ísu Káráísiti iyámpói aúꞋmái miwítí ándávaꞋa kumbéna amáparawairaꞋa kárákwiyisata kwenáwíta mósá maꞋmaéta kwéiyunda mindá árair-aimban-iye.

6 Áánútu Ísareri-andaraken-kwaasivinkemba íma amápaꞋa ítámakaivo évakarawai ítámakaimba Áánútu asirámakain-aimba arááíraiye íma seénáisaiye. 7 Ááváramu aísaavutantamba uráawai íma amáparawain-ovo évakaꞋa Áánútuna iyámpói owaná naaóváꞋá Áánútu Ááváramuntavena séna enááninko áwíꞋa Áísákaa kwenaísaavutantamba ónááowaiye suꞋmaiyavena séna enaísaavutantamba kwéowe sénááowe Áánútu siráiye. 8 mináínkóná ááimba maarán-áímbán-iye. Ááváramu aísaavutantamba uráawaivinkemba íma amáparawain-ovo Áánútu kesí kwaásima owémó asiramáímo siráiwaiye suꞋmai Áánútuna kwaásiman-owe. 9 naaóváꞋá Áánútu Ááváramuntavena simái asirámakain-aimba séna súnda-kanaama tínaꞋa máyáanana Séraa inaamaí-íyámpóí ankáníye sirómba 10 mináímbá kentáá síkwáꞋnáma Áísákaantavena siráiye. kwemá anón-éna aaraí mayówana awainínkó áwíꞋa Árépéka agováraer-iyampoi 11 íma tínkaroyasarai miníyámpóíráí íma mayáí mairóyankaꞋa 12 Áánútu minínínkóntávéna séna ená iyámpóíraimo ésarai aivakéwáí naaén-iyampoigona mayáí mayáníye siráiye. Áánútu kwená imáyáavinkemba kwená kwaási-iꞋa umái ítámarena tááyaraivo miwítí mayáí íma awánarena tááyaraiye. miráumai naaóváꞋá séna ená iyámpóíraimo ésarai aivakéwai naaén-iyampoigona mayáí mayáníye siráiye. 13 Áánútun-aai aúváívimba miníyámpóíráíyávéna agaimaréna séna

Yákópomba ítámareꞋa Ísomba
sínaaemba umámune Áánútu siráiye
agaimaréna siráiye.

14 évakarawai mindáyavesa imáyáa ésa kampaꞋá sésa Áánútu íma arupí kwéiyemo kwésemba mindá kampar-áímbán-iye. 15 naaóváꞋá Áánútu Mósesintavena séna

sirumbá umátinkanae súndawaiyaveꞋa sirumbá kwéumatinkaumne. kaweꞋá umátinkanae súndawaiyaveꞋa mirá kwéune
siráiye. 16 miráumai kwaási tiráái kwétaintavenawe kwaási kaweꞋ-máyáí kwémayaantavenawe ímanivo Áánútu kwená imáyáavinkemba séna sirumbá umátinkanae siráintavena kwená kwaási-iꞋa umái kwéitamaraiye. 17 Áánútun-aai aúváí-kwandaaivimba agaimaréna séna

Mósesi máyonkaꞋa Ísípi-maravaꞋa kárákwirowai kwentávéna Áánútu séna amápaꞋ-maravaken-kwaasi kesí asirayándéímó enaneꞋó úndama awánésa kesúwíꞋa isáígwáe séꞋa embá kárákwiyi-mayairaꞋa usásinankaraumne Áánútu siráiye
agaimaréna siráiye. 18 miráumai Áánútu kwená imáyáavinkemba kwembó arááímo tainíꞋo énamo sirumbá umátinkanaemo simbá arumbá umátinkena kwembó arááímo tainíꞋo énamo tiruntémó máráaniꞋo imbá tiruntémá máráaniꞋa kwéumatinkaiye.

Áánútu áwááꞋa tiyéna arumbá umátinkenamo in-kwásáí.

19 mindáyaveꞋa imáyáa éꞋa maarán-áímbá íma seró. sáwíta kwéundaya nóra séna Áánútu aaivintá kwémaisinkaiyo. Áánútu imáyáa éna séna sáwíꞋa ónááowe siráimba mindáya sáwíꞋa kwéundayaawe. miráumai aaivimbó kwémaisinkainta mindá sáwíꞋa kwéiye mináímbá íma seró. 20 keinárawaꞋa úwoi-kwaasi máyáavo Áánútumo siráinda-aimba anondá íma seró. maarán-áímbá imáyáa oró. sawei-ánáveumba ombá karíꞋ-márámá mairésa sawei-ánáveumba úmaraawana misáwéí-ánáveunko íma maarán-áímbá séna nóra éra kembá mirá kwéumasinkaao íma kwésiye. 21 sawei-ánáveumbo ombá mimbórá-káríꞋ-márámá mairésa kaer-ánáveumba úmaresa moórávimba úwoi-mayai maésa moórávimba kaweꞋ-máyáí kwémayaamba mindá miwínéímán-iye.

22 Áánútu miráráámbá kwéiye. Áánútuna asirayáné áwááꞋo kwésine awánanaaontavena sáwíꞋo uráan-kwaasimo tínkaminimba miwítí meéyámbá póna ááéma íma tínkamimba timuꞋmaréna ména naaémba tínkaminiye. 23 kentáá ítámarenaya arumbá umásínkáinta póta kweséya ságayan-ayampata méta kwená óꞋoran-kaweꞋ-mayai awánanaundayavenaya Áánútu sáwíꞋo uráan-kwaasi íma ááéma tínkamimba timuꞋmaréna máyáiye. 24 íma Yútaa-kwaasivinkene suꞋmaiya sááyaraivo óꞋonkaa-kwaasigwaraꞋa tááyaraiye. 25 miráumai naaóváꞋá Áánútun-aai simátímakowai áwíꞋa Ósíya agaimaréna séna

Áánútu séna íma kesí kwaási-iꞋa uráan-kwaasiyaveꞋa kesí kwaásiman-owe séꞋa ímo sirumbó tímakaundayaveꞋa sirumbá kwétimune sénaumne. 26 íma kesí kwaásiman-owe siráundavaꞋa máyáawaiyaveꞋa naaémba kesáánimbaaꞋan-owe sénaumne Áánútu asirayánkwáráwáí síníye
Ósíya agaimaréna siráiye. 27 naaóváꞋá Áánútun-aai simátímakowai áwíꞋa Áísáya agaimaréna séna

Ísarerin-andaraken-kwaasi sáwívaꞋa ésa nonáámááíraamba umái sáwíva-kwaasi ménaaovo Áánútu íma amápaꞋa tiránívo évakaꞋa sáwíꞋo umái máyáampinkemba tiráníye. 28 Ísóigo amáparawai avekáán-umai aaivimbá maitinkéna sáwí-meyamba tímatuwaniye
agaimaréna siráiye. 29 moórávaꞋa Áísáya agaimaréna séna

Ísóigo amápar-asirayambo tokáiwaimo sénamo évakarawai íma tínkamonda tiyúwáanasa mésa iyámpói tinkánááowe siráinkakai Sótómu-naopaken-kwaasiye Kómóraa-naopaken-kwaasiyemo putásaraantemba kesáágwáráꞋá miráyá úsino
agaimaréna siráiye.

Ísareri-kwaasi Ísun-aaiyavai íma áraire siráan-kwasai.

30 mináínkóná ááimba maarán-áímbán-iye. óꞋonkaa-kwaasi Áánútu aúrankaꞋa arupí umáímo máyáan-ambo ímo avakáá uráawai Ísu Káráísitin-aai isésa sésa áraire siráamba póna Áánútu kwenaúrankaꞋa arupí umátínkaraiye. 31 miwí mirá uráavo Yútaa-kwaasi Áánútu ítámakaiwai sésa Áánútu Mósesimbo simámakain-amaamba kwáráananaya kwenaúrankaꞋa arupíya umásinkaniye siráavo Áánútu Mósesimbo simámakain-amaankona ááimba íma isésa kwenaúrankaꞋa íma arupí umái máyáawe. 32 Áánútuna ámáámba kwáráananaya kwenaúrankaꞋa arupíya umásinkaniye siráavo kwenááiyavesa íma áraire siráantavena íma arupí umátínkaraiye Áánútun-aai aúváí-kwandaaivimba Ísuntavena simái agaimaréna séna

Áánútu séna ísáaro. Sáíyono-naopaꞋa moórá-ontamba maráúnda pósa minóntánkáꞋá tísamaima turarésa tanaambá vánááowe. óntantavenamo siráintembo íníwaimpaꞋo agevamáímo ménaaowai íma tigaeyávésa ónááowe siráiye
mináímbá agaimaréna siráiye. óntanemo siráimba Ísuntavena siráiye. óntankaꞋo tanaambó vaantembá Ísu Káráísitin-aai araaisésa miráumai tanaankáámbá varáꞋnaumai máyáawe.